FC Shkupi fiton dhe bind ndaj Pobedës (VIDEO)

FC Shkupi përveç fitores së madhe 3:0 ndaj Pobedës së Prilepit, ka bindur me lojën e saj, duke paralajmëruar edhe kundërshtarët e ardhshëm në Ligën e Parë Futbollistike të Maqedonisë, njofton “infOSport.mk”.

Pas barazimit heroik në Kratovë, kur vetëm në sekondat e fundit arritën që të barazojnë ndaj Sileksit, sot në stadiumin e Çairit të përzgjedhurit e trajnerit Umit Karan, në asnjë moment nuk dyshuan tek fitorja, të cilën me një super gol në minutën e 38-të e paralajmëroi  kapiteni Muarem Bajrami.

Mesfushori shkupjan ekzekutoi në mënyrë perfekte një goditje dënimi nga rreth 20 metra, duke mposhtur portierin Tofiloski, i cili deri në ato momente ishte superior në portë, edhe pse në një moment në minutën e 25-të kishte aleat shtyllën pingule, pas goditjes së Ustabashit.

Me rezultatin 1:0 u shkua në pushim, ndërsa në pjesën e dytë “bardhekaltërit” nga Çairi të entuziazmuar edhe nga përkrahja frenetike e tifozëve të tyre, “Shvercerat” arritën që të realizojnë edhe dy gola të tjerë.

Në një moment paniku, kur Tofiloski devijoi topin në rivënie anësore, Filip Ristovski me shpejtësi ekzekutoi të njëjtën, duke gjetur brenda zonës sulmuesin Viktor Angellov, i cili në manirin e golashënuesve të mëdhenjë në minutën e 50-të, edhe për herë të dytë mposhti portierin Tofiloski.

Ky i fundit në minutën e 75-të u detyrua që edhe njëherë tjetër të nxjerrë topin nga rrjeta e tij, kjo paksa edhe për fajin e mbrojtësit Aleksandar Ristevski, i cili humbi një top, ndërsa këtë më së miri e shfrytëzoi braziliani Serzhinjo, që në ato momente vendosi rezultatin përfundimtarë të këtij takimi, FC Shkupi 3, Pobeda 0.

Me këtë fitore FC Shkupi tashmë numëron 27 pikë, vetëm një më pak se Rabotniçki i vendit të katërt, teksa Pobeda mbetet e ngujuar në pozitën e fundit me vetëm 18 pikë të tubuara, po aq sa ka edhe Bellasica në pozitën e parafundit.