Lajm i bujshëm nga Gjermania, klubi i Bundesligës hap dyer për tifozët

Sipas gazetës gjermane “BILD”, autoritetet shëndetësore të qytetit gjerman Lajpcig, kanë dhënë miratimin për hapjen e dyerve të stadiumit “Red Bull Arenas” për ndeshjen kundër Majncit, e planifikuar për t’u zhvulluar më 20 shtator, për javën e parë të kampionatit të Bundesligës për sezonin 2020-2021.

Të pranishëm në stadium do të jenë 8 400 tifozë, që korrespondon me 20% të kapacitetit.

Biletat për të marrë pjesë në këtë sfidë do të shpërndahen mes 22 500 të abonuarve, që do të thotë se nuk do të ketë bileta në shitje.

Për më tepër, vetëm tifozët që banojnë në Saksoni mund të marrin pjesë në shortin e ndarjes së biletave.

Miratimi erdhi në bazë të shkallës aktuale të infeksionit në qytet, i cili ka rreth 600 000 banorë. Incidenca shtatë ditore (rastet për 100 000 banorë brenda një jave) në Lajpcig është aktualisht 3.2. Nëse vlera mbetet nën 20, asgjë nuk do ta pengojë Bundesligën të hapë dyert në masë për tifozët. Kampionati gjerman do të jetë ndër të parët në Europë që do të lejojë publikun të jetë i pranishëm në stadiume në epokën e COVID-19.

Leave a Reply