Vashat e Maqedonisë pësojnë disfatë në ndeshjen e dytë ndaj Kosovës

Përfaqësuesja e Kosovës në futboll në konkurrencën e femrave ka shënuar fitore ndaj Maqedonisë së Veriut, në miqësoren e dytë të zhvilluar këtë herë në Prishtinë.

Pas humbjes së pësuar të premten në ndeshjen e parë të zhvilluar në Shkup (1:3), “Dardanet” kësaj radhe kanë triumfuar me rezultat bindës, 4:0.

Kosova e nisi shumë mirë ndeshjen dhe kaloi në epërsi qysh në minutën e dytë, me golin e shënuar nga Valentina Metaj. Ky gol bëri që të përzgjedhurat e Karin Annel Andersen në vazhdim të luajnë më të qeta dhe ta menaxhojnë epërsinë e krijuar. Pjesa e parë u mbyll me shifrat 1:0, derisa në kaptinën e dytë Dardanet u treguan edhe më efikase duke shënuar edhe tre gola tjerë.

Erëleta Memeti realizoi dy herë në minutat 59’ dhe 74’, duke e përmbyllur çështjen e fituesit të këtij takimi, teksa me një gol kontribuoi edhe Blerta Shala, e cila e vendosi rezultatin përfundimtar 4:0, në minutën e 87-të.

Këto dy miqësore i kanë shërbyer përzgjedhëses Andersen për ta parë formën e lojtareve dhe për të përçuar tek ato idetë dhe strategjinë e lojës për ndeshjet e ardhshme kualifikuese.

Leave a Reply