Sileksi rikthehet te fitorja, Rabotniçki dhe Vardari vetëm me barazime (VIDEO)

Sileksi është rikthyer te fitorja në elitën e futbollit vendor. Skuadra nga Kratova e udhëhequr nga strategu shkupjan, Zhikica Tasevski sot në ndeshjen e javës së 25-të në teren vendas me rezultatin minimal 1:0 mundi Pobedën e Prilepit, njofton “infOSport.mk”.

Golin e vetëm të vlefshëm tre pikë për Sileksin, e realizoi mbrojtësi serb, Dejan Bllagojeviç në minutën e 26-të. Ndryshe ishte kjo fitorja e parë e Sileksit pas tre ndeshjeve, ku kishte regjistruar dy disfata dhe një barazim ndaj FC Shkupit.

Për dallim nga Sileksi, Rabotniçki nuk arriti që të shfrytëzojë epitetin e skuadrës vendase në ndeshjen ndaj Akademia Pandev. Në ndeshjen e zhvilluar në stadiumin kryesor pranë komplekist të Federatës së Futbollit të Maqedonisë, “romantikët” barazuan 1:1 ndaj skuadrës nga Strumica, e cila e para kishte avansuar në këtë ndeshje me golin e realizuar nga David Atanasoski në minutën e 36-të.

Barazimin skuadrës së Rabotniçkit ia siguroi Nikolla Sharkoski, i cili në maksimum shfrytëzoi gabimin e mbrojtësit Dimov dhe nga brendia e zonës shënoi në rrjetën e Vujanac për rezultat 1:1.

Rabotniçki shumë lehtë mund të ndodhte që nga kjo ndeshje të dilte edhe me tre pikët e plota, mirëpo Viktor Angellov në minutën e 60-të humbi një penalti, duke goditur vetëm mbi portë.

Me barazim, mirëpo pa gola u mbyll edhe derbi i përjetshëm midis Pelisterit dhe Vardarit, njëjtë sikurse edhe ndeshja midis Skopjes dhe Shkëndijës, teksa Renova në Tetovë me rezultatin 3:1 mundi Shkupin.