Futbollistët kosovarë që luajnë me Kombëtaren e Zvicrës, Granit Xhaka dhe Xherdan Shaqiri gjatë ditës së djeshme u dënuan financiarisht nga FIFA për gjestin e tyre me shqiponjë kur festuan golat e shënuara në ndeshjen kundër Serbisë në Kampionatin Botëror.
Që të dy u dënuan me nga 10 mijë franga zvicerane, teksa një gjobë prej 5000 frangash morri edhe kapiteni i Zvicrës, Stefan Litshtajner.
Por duket se ata nuk do t’i paguajnë vetë këto para, pasi tashmë ka nisur kampanja për mbledhjen e fondeve në mënyrë që t’iu paguhet dënimi, njofton Klan Kosova.
Kampanja është hapur në platformën e mbledhjes së fondeve në mënyrë vullnetare, “Gofundme”.
“Ata sollën gëzim dhe lumturi për të gjithë zviceranët dhe shqiptarët gjithandej globit, prandaj ndajeni një moment dhe mbështetni ata”, thuhet në përshkrimin e kampanjës.
Aty thuhet po ashtu se nëse Federata e Futbollit e Zvicrës nuk i pranon këto para, paratë e grumbulluara do të dhurohen për bamirësi.
Duket se kampanja shpejt është përhapur në rrjete sociale dhe tashmë kanë nisur donacionet e para ku edhe janë mbledhur mbi 1000 euro deri tani.
Mes atyre që dhuruan para për fondin që synon ta paguajë dënimin e Xhakës, Shaqirit dhe Litshtajner, është edhe ambasadorja e Kosovës në SHBA, Vlora Çitaku që ka dhuruar 100 dollarë.
