Menjëherë pas zyrtarizimit të kontratës së Amir Rrahmanit me Veronën, “infOSport.mk” kontaktoi menaxherin dhe njeriun më të merituar për këtë transferim, Adrian Aliaj, ndryshe ish futbollistë i Kombëtares shqiptare, të cilin të gjithë e mbajmë mend pas atij super goli të shënuar ndaj Greqisë, atëherë kombëtare kjo që sa ishte shpallur kampione e Europës në Portugali.
Pikërisht Aliaj në një prononcim për “infOSport.mk” na zbuloi detajet e kontratës, duke potencuar se është tepër i kënaqur që një futbollistë shqiptarë, si Rrahmani të luaj në nivele të futbollit si “Serie A”.
“Jemi të lumtur që një shqiptarë arriti në nivele të ‘Seria A’. Rrahmani e ka merituar një gjë të tillë. Ai cilësitë e tij i ka treguar me Dinamon e Zagrebit dhe sidomos me përfaqësuesen e Kosovës. Meritat për këtë transferim janë të lojtarit” – u shpreh Aliaj drejtëpëdrejtë nga Verona për “infOSport.mk”.
Rrahmani sipas asaj që na tha vetë Aliaj, me Veronën ka firmosur kontratë 4 vjeçare, ndërsa për shërbimet e tij drejtuesit e skuadrës italiane kanë harxhuar 2 milion euro.
