Voska Sport të shtunën në Tetovë i shkaktoi Teteksit një ndër disfatat më të rënda në histori, duke e mundur me rezultatin 6:0, shkruan “infOSport.mk”.
Ishte kjo një fitore më se e merituar e skuadrës shqiptare nga Ohri, që përë këtë vit objektiv kryesor ka inkuadrimin në Ligën e Parë.
Me këtë fitore, Voska Sport po ecën me hapa të sigurtë drejt objektivit, ndërsa kjo disfatë kishte shkaktuar një tërmet të vërtetë te skuadra e Teteksit, që sot përmes faqes zyrtare në “facebook” njoftoi për largime shumë të rëndësishme nga kjo skuadër.
I pari që është larguar, është Vojo Tofilovski, që luante rolin e presidentit të Këshillit Drejtues të Teteksit, ndërsa gjithashtu përmes një njoftimi, nga skuadra tetovare kanë njoftuar edhe largimin e dyshes së trajnerëve, Sllavço Georgievski dhe Dejan Cvetkovski.
Si duket disfata e fundit nga Voska Sport ka lënë shumë pakënaqësi te skuadra e Teteksit, që pas 24 xhirove renditet në pozitën e katërt me 35 pikë, 20 më pak se Voska Sport që mban pozitën e dytë në renditjen tabelare në Ligën e Dytë – Perëndim.
Kur kanë mbetur edhe 3 xhiro deri në fund të sezonit 2021/2022, Teteksi do të luaj edhe me Sileksin në Kratovë, që më pas të ketë dy ndeshje shumë të rënda me rival të drejtëpërdrejtë për mbijetesë, Korabin dhe Ohrid Lihnidos. (infOSport.mk)
