Bruno Dita, mesfushori difenziv nga Tirana gjatë ditës së sotme edhe zyrtarisht ka vazhduar kontratën me Shkëndijën edhe për dy vite tjera. Kështu 29-vjeçari me skuadrën “kuqezi” nga Tetova do të luaj deri verën e vitit 2024, njofton “infOSport.mk”.
Pasi nënshkroi kontratën, Dita foli për faqen zyrtare të Shkëndijës, ku tha se dëshira e tij e madhe për të qenë pjesë e Shkëndijës bënë që ai të vazhdojë bashkëpunimin me skuadrën nga Tetova, qytet këtë të cilin tashmë e ndjen edhe shpirtërisht.
“Jam shumë i lumtur që sot nënshkrova kontratë të re me Shkëndijën dhe që do të vazhdoj edhe për dy vite tjera të mbaj fanellën kuqezi. Falënderoj drejtuesit e klubit që mundësuan vazhdimin e kontratës, por ka qenë edhe dëshirë e imja që të vazhdoj të jem pjesë e Shkëndijës. Posaçërisht më vjen mirë që do të vazhdoj qëndrimin në qytetin e Tetovës sepse e ndjej që jam lidhur edhe shpirtërisht me Tetovën. Në Shkëndijë kemi formuar një grup të mirë dhe jam i bindur se në periudhën në vazhdim do të shënojmë sukseset e radhës me Shkëndijën, ndërsa unë premtoj se do të jap maksimumin për këtë fanellë” – tha Bruno Dita pas nënshkrimit të kontratës së re me kuqezinjtë.
Dita edicionin që lamë pas zhvilloi 28 ndeshje me fanellën e Shkëndijës, për të cilën skuadër në përgjithësi, që nga arrdhja e tij verën e vitit 2020, ka zhvilluar 59 ndeshje, duke realizuar edhe 2 gola dhe 3 asistime. (infOSport.mk)
