Renova tërhiqet nga gara për Mbellan, shfaqen Sileksi dhe Rabotniçki

Renova është tërhequr nga gara për të transferuar kamerunasin me pasaportë franceze, Emanuel Mbella, njofton “infOSport.mk”. Skuadra nga Xhepçishti te ish sulmuesi i FC Shkupit shihte zëvendësim adekuat për të larguarin Argjent Gafuri, mirëpo kërkesat e larta dhe paga që ka kërkuar Mbella, kanë bërë që Renova të ndërpresë bisedimet me menaxherin e futbollistit në fjalë.

“Renova nuk është në garë për Mbellan. Ata ndërprenë bisedimet për shkak çmimit të futbollistit. Gjithashtu edhe Gjilani u tërhoq nga gara, ndërsa në bisedimet për shërbimet e klinetit tim janë shfaqur së fundmi edhe Rabotniçki dhe Sileksi. Dy skuadra këto që pretendojnë Europën, ashtu që mbetet të shohim nëse do gjejmë ndonjë gjuhë të përbashkët” – tha enkas për “infOSport.mk” menaxheri i kamerunasit, Blerim Sadiku.

Rikujtojmë përveç këtyre dy skuadrave të lartëpërmendura, nga Maqedonia si skuadra që mund të vijnë deri tek shërbimet e Mbellas përmenden edhe dy skuadrat më të mira të vendit, Shkëndija dhe Vardari, ndërkohë nga Kosova, është Llapi që dëshiron të bëjë për vete sulmuesin 25-vjeçar. Gjithashtu së fundmi interesim për Mbellan kanë shfaqur edhe Partizani i Tiranës dhe Flamurtari i Vlorës. Mbetet të shihet se cili do të jetë destinacioni i rradhës i ish sulmuesit të skuadrës së FC Shkupit, që sipas menaxherit të tij do të bëhet i ditur deri në fundin e kësaj jave.

Leave a Reply