Kristiano Ronaldo edhe me një rekord tjetër të jashtëzakonshëm (VIDEO)

Ylli portugez i Real Madridit, Kristiano Ronaldo ka shkruar emrin e tij në historinë e futbollit evropian. Ronaldo u bë futbollisti i parë që arriti shifrën prej 100 golave të shënuar në kuadër të kompeticioneve evropiane në nivel klubesh.

CR7 shënoi dy golat e fitores sonte përballë Bajernit të Munihut në “Alianc Aarena” në ndeshjen e parë çerekfinale të Ligës së Kampionëve Evropian.

Golin e tij të parë në kuadër të kompeticioneve evropiane për klube, Ronaldo e realizoi në fitoren e paharuar 7:1 ndaj Romës në ndeshjen çerekfinale të kthimit në “Olld Traford” në prillin e vitit 2007.

32-vjeçari Ronaldo 97 gola ka realizuar në Ligën e Kampionëve, 2 në kuadër të Superkupës Evropiane dhe një gol në fazën eliminatore të Ligës së Kampionëve Evropian.

Kristiano Ronaldo shifrën prej 100 golave të shënuar e ka arritur në 143 ndeshje, ndërsa më afër tij është super ylli i Barcelonës, Lionel Messi me 97 gola të realizuar në 118 ndeshje.

Shumë larg pas tyre renditet legjenda e Realit të Madridit, Raul Gonzales, i cili në 158 ndeshje kishte realizuar 76 gola.