Antonio Konte humbet një nga ushtarët e tij në këtë sprint final të sezonit në Serie A. Arturo Vidal i transferuar te Interi me shumë bujë në merkaton e verës do të mungojë për rreth një muaj, pasi do t’i nënshtrohet një operacioni në gjurin e majtë.
Ai vuan nga problemet në menisk, ndërsa ka qenë vetë klubi “zikaltër” që ka dalë me një njoftim në faqen zyrtare duke bërë të ditur dëmtimin e Vidal dhe nevojën që ka kiliani për një ndërhyrje në gju për të qenë plotësisht i gatshëm dhe në formën optimale në muajin prill pas ndalesës së kombëtareve.
I ardhur nga Barcelona me shumë bujë në merkaton e verës, Vidal ka zhgënjyer në gjysmën e parë të sezonit me Interin duke humbur edhe vendin e titullarit në fazën e dytë të kampionatit, me trajnerin Antonio Konte që ka preferuar danezin Kristian Eriksen.
Vidal gjithsesi u hodh në fushë nga Konte si titullar në ndeshjen e së hënës ndaj Atalantës duke bërë një paraqitje shumë të dobët dhe duke u zëvendësuar në fillimin e fraksionit të dytë nga Eriksen. Në këtë sezon me Interin Arturo Vidal është aktivizuar në 30 takime në të gjitha kompeticionet duke shënuar dhe 2 gola.
