Holanda dhe Ukraina kanë zhvilluar ndeshjen më atraktive të deritanishme në kuadër të Euro 2020, njofton “infOSport.mk”.
Ishte kjo ndeshja e dytë e grupit “C”, në të cilën “tulipanët” shënuan fitore 3:2, duke gëzuar në fund tifozët e tyre në “Amsterdam Arena”, aty ku Maqedonia do të zhvillojë ndeshjen e fundit të grupit me 21 qershor.
Vlen të theksohet se të gjithë 5 golat u realizuan gjatë pjesës së dytë, me Holandën që avansoi me shifrat 2:0 falë golave të shënuar nga Vijnaldum (52’) dhe Veghorst (59’).
Mirëpo kur të gjithë menduan se Holanda do të arrijë një fitore komode, ashtu nuk menduan ukrainasit, të cilët brenda 4 minutave barazuan shifrat në 2:2.
Jarmolenko në minutën e 75-të ngushtoi epërsinë në 2:1, derisa për barazimin e rezultatit u përkujdes Jaremçuk (79’).
Holanda nuk u dorëzua dhe në minutën e 85-të Dumfries shënoi golin e tij të parë në një event të këtillë me fanellën “portokallinj”, duke i siguruar fitoren e parë në kuadër të Euro 2020.
