Të mërkurën në program janë ndeshjet e javës së 18-të dhe të fundit për gjysmësezonin vjeshtor në Ligën e Parë të Futbollit të Maqedonisë së Veriut.
Xhiroja e fundit e këtij stinori na sjell përballjen midis dy skuadrave shqiptare, FC Shkupit dhe Struga Trim Lumit.
“Bardhekaltërit” nga Çairi kanë ecur mirë në këto 17 xhiro dhe mbajnë pozitën e dytë në renditjen tabelare me 6 pikë më pak se Shkëndija kryesuese, ndërsa struganët me fitoren e fundit ndaj Rabotniçkit, tashmë renditen në pozitën e katërt.
Liderja aktuale Shkëndija në këtë xhiro do të mirëpret Pelisterin e vendit të 10-të, ndërsa Renova do të ketë një përballje shumë të vështirë në Shkup përballë Makedonija Gjorçe Petrovit.
NDESHJET TJERA – Rabotniçki në arenën “Todor Proeski” do të jetë nikoqir i Borecit, Bellasica në Strumicë do të luaj kundër Vardarit, ndërkohë në përballjen e fundit Sileksi do të mirëpret Akademia Pandevin.
Të gjitha ndeshjet e kësaj jave do të luhen në terminin e njejtë, nga ora 13:00.
Pas këtyre ndeshjeve kampionati elitar shkon në pushim dimëror dhe rikthehet me 14 shkurt të vitit 2021 me ndeshjet e xhiros së 19-të.
