Përfaqësuesja futbollistike e Maqedonisë në konkurrencë të femrave ka regjistruar edhe disfatën e dytë në kuadër të Ligës së Kombeve, njofton “infOSport.mk”.
Të përzgjedhurat e trajnerit Izov sot në Shkup në kuadër të xhiros së dytë të grupit 5 të në Ligën “C”, u mundën nga Kosova me rezultatin 2:0.
Vashat kosovare e dominuan ndeshjen që nga fillimi dhe krijuan raste të njëpasnjëshme, teksa rezultati u zhbllokua në minutën e 20-të.
Ishte Valentina Limani, e cila me gjuajtje të fortë e të saktë nga rreth 20 metra arriti ta çojë topin në rrjetën e portës së Magdalena Lekovkës për 1:0.
“Dardanet” vazhduan me lojë të mirë edhe në vazhdim të pjesës së parë, e si rrjedhojë arritën të gjejnë edhe golin e dytë.
Në minutën e 41-të Kaltrina Biqkaj harkoi nga krahu i djathtë, derisa reagimin e dobët të portieres Lekovska e shfrytëzoi Valentina Metaj, e cila nga afërsia shënoi për 2:0.
Edhe në pjesën e dytë futbollistet “dardane” bënë paraqitje të mirë dhe e administruan epërsinë e pjesës së parë, duke mos u lejuar futbollisteve të përfaqësueses së Maqedonisë që të rrezikojnë portën e Alma Demirit.
Pas kësaj fitoreje Kosova ka 4 pikë dhe kryeson renditjen, aq sa ka edhe Bullgaria në pozitën e dytë.
Ndeshjen e radhës Maqedonia do ta zhvillojë sërish kundër Kosovës, këtë herë në stadiumin “Fadil Vokrri” me datë 31 tetor me fillim në ora 17:00. (infOSport.mk)
| Maqedonia e Veriut – Kosova 0:2 |
| Stadiumi: “FFM Training Center” – Shkup |
| Gjyqtare: Michaela Pachtova, Zuzana Špindlerová, Katka Hruskova (Çeki) |
| Shënuese: Valentina Limani (20′), Valentina Metaj (41′) |
| Kartonë të verdhë: Petkova, Maksuti (MV) |
| Maqedonia e Veriut: Lekovska, Petkova (Mileska), Milchevska, Kolarovska, Evtinxhioska, Velkova, Mustafa (Salihi), Shemsovikj (Petrushevska), Markovska, Roçi, Maksuti. |
| Kosova: Demiri, Ramaj, Kastrati, Smaili, Kryeziu (Ramadani), Lulaj (Shala), Metaj (Rexhi), Misini, Limani (Guri), Halilaj (Memeti), Biqkaj. |
