Shkëndija tenis ndaj Rabotniçkit (VIDEO)

Shkëndija ka shënuar një fitore shumë më të lehtë se sa pritej në derbi ndeshjen e javës së 5-të në elitën e futbollit vendor, shkruan “infOSport.mk”.

Të besuarit e trajnerit Qatip Osmani me rezultat tenistik, 6:2 mundën Rabotniçkin në stadiumin e Gjorçe Petrovit, aty ku ditë më parë këto dy skuadra në kuadër të 1/8 së finales të Kupës së Maqedonisë barazuan me rezultatin 1:1.

Fitoren e Shkëndijës e paralajmëroi kapiteni Ferhan Hasani me golin e realizuar nga pika e bardhë vetëm pas 7 minutave lojë.

Nuk vonoi shumë dhe një autogol i Iliev bëri që Shkëndija të avansojë me rezultatin 2:0, ndërkohë pas një aksioni të bukur të skuadrës tetovare Bllagoja Todorovski në minutën e 34-të edhe për herë të tretë arriti që të shënojë në rrjetën e “romantikëve”.

Vendasit 4 minuta më vonë përfituan një penalti në zonën kundërshtare, të cilën në gol e shndërroi Kire Markoski në minutën e 38-të, teksa ishin “romantikët” ata të cilët pas 8 minutave lojë në pjesën e dytë realizuan edhe golin e dytë, duke sjellë paqartësi, mirëpo vetëm për një moment, pasi  në vazhdim Shkëndija gjithçka vendosi në kontroll.

Autorë i golit të dytë për Rabotniçkin ishte nigeriani Çinedu Çarls, i ardhur nga Skënderbeu i Korçës, i cili mjaft mirë shfrytëzoi gabimin e mbrojtësve të Shkëndijës, duke shënuar një super gol nga distanca.

Megjithatë kjo ishte e tëra që mundën të bëjnë të përzgjedhurit e trajnerit Viktor Trenevski, pasi deri në mbyllje të takimit, ishte vetëm Shkëndija ajo që shënonte, duke shtuar në këtë mënyrë edhe tre gola të tjerë.

Armend Alimi me një goditje nga distanca në minutën e 56-të shënoi edhe golin e katërt për Shkëndijën, futbollistët e së cilës skuadër pas një aksioni mirë të organizuar në minutën e 74-të, i mundësuan kapitenit të tyre Ferhan Hasani të shënojë edhe golin e dytë personal dhe të pestin për Shkëndijën.

Rezultatin përfundimtarë të këtij takimi, Rabotniçki 2, Shkëndija 6, e vendosi rezervisti Shefit Shefiti, i cili pas një kombinimi të mirë me Besart Ibraimin 7 minuta para fundit të takimit me kokë shënoi edhe golin e 6-të në rrjetën e Shishkovskit.

Me këtë fitore Shkëndija kryeson tashmë bindshëm renditjen tabelare me 13 pikë, 5 më shumë se dy ndjekësit më të afërt Pelisteri dhe Akademija Pandev që kanë nga 8 pikë, ndërohë Vardari pas barazimit të sotshëm me Skopjen në transfertë pozicionohet në vendin e katërt me 7 pikë të tubuara.

Në dy ndeshjet tjera të kësaj jave, Shkupi në Kratovë realizoi një fitore të madhe ndaj Sileksit, teksa Pobeda dhe Akademija Pandev barazuan me rezultatin 2:2.