Me shtimin e rasteve të të prekurëve nga koronavirusi në Europë dhe jo vetëm, rritet pesimizmi për fillimin e kampionatave kombëtare, por gjithashtu edhe të ndeshjeve në kuadër të Ligës së Kampionëve dhe Liga Europa si dhe përfundimin e tyre në fund të qershorit siç e kanë parashikuar krerët më të lartë të UEFA-s.
Duke iu referuar asaj çfarë shkruan gazeta italiane “Corriere Dello Sport”, të martën është në program një tjetër mbledhje e UEFA-s ku do të diskutohet pikërisht për kalendarin dhe për mënyrën se si mund të mbyllet ky sezon futbollistik pa cënuar sezonin e ardhshëm dhe Euro 2020 që do të zhvillohet në verën e vitit 2021.
Ideja më e fundit e presidentit të UEFA-s, Aleksander Çeferin është të ulë numrin e ndeshjeve në garat ndërkombëtare si dhe të spostojë për një afat tjetër pauzën e kombëtareve në program nga data 1 deri në 9 qershor për të patur kohën e mjaftueshme që të mbyllen kampionatet.
Përtej datës 30 qershor drejtuesit e UEFA-s nuk duan të shkojnë pasi do të vinin në rrezik vijueshmërinë e sezonit të ardhshëm. Por nëse zgjedh të mos përfundojë Liga e Kampionëve dhe Liga Europa, krerët e UEFA-s atëherë do t’u jepnin një asist kampionateve kombëtare të cilët mund të luhen me më shumë lirshmëri në këtë periudhë të vështirë.
Gjithsesi vendimi përfundimtar i takon UEFA-s.
