Honore Gomis është shumë pranë firmosjes së kontratës me FC Shkupin. Sulmuesi senegalez disa ditë me rradhë po stërvitet me skuadrën nga Çairi, ndërsa sot zhvilloi edhe ndeshjen e tij të dytë me fanellën “bardhekaltër”.
Për dallim nga ndeshja ndaj boshnjakëve të Çelik, kur në lojë u inkuadrua gjatë pjesës së dytë, sot përballë ukrainasve të Çernomorec Odesa, ai luajti që nga minuta e parë, madje duke rrezikuar në disa raste portën kundërshtare.
Bëhet fjalë për një super sulmues, i cili vitin e kaluar ishte shpallur si futbollisti më i mirë në futbollin senegalez, ndërsa gjithashtu edhe si golashënues dhe asistues më i mirë me fanellën e skuadrës së Guédiaëaye.
Burime të “infOSport.mk” bëjnë me dije se Gomis është pëlqyer nga ana e trajnerit Ardian Nuhiu, i cili beson se me të në skuadër, FC Shkupi do të përfitojë në cilësi dhe se do të jetë një super përforcim për skuadrën e tij gjatë stinorit pranveror. Rikujtojmë FC Shkupi pjesën e parë të sezonit 2017/2018 e mbylli në pozitën e 6-të me 23 pikë, vetëm dy pikë më pak se skuadra e katërt në renditje, Akademia Pandev.
