Besmir Bojku: Struga Trim Lum ende nuk e ka dhënë fjalën e fundit

Struga Trim Lum – Shkëndija është kryendeshja e javës së 21-të në elitën e futbollit vendor që në program është nesër. Këto ndeshje pavarësisht se ku luhen, gjithnjë kanë zgjuar interesim të madh, ndërsa ashtu pritet të jetë edhe nesër në Strugë.

Edhe Bojku pret tribuna të mbushura dhe një fitore të madhe, që do të shënonte një rikthim të rezultateve pozitive.

Jemi të vetëdijshëm se përballemi me një skuadër shumë kualitative, siç është Shkëndija, mirëpo Struga Trim Lum akoma nuk e ka thënë fjalën e fundit…” – u shpreh fillimisht Besmir Bojku.

Ai pranoi se skuadra e Struga Trim Lum ndodhet në një minikrizë, pas tre disfatave të njëpasnjëshme të pranverë.

“E vërtetë është se ndodhemi të themi në një mini krizë, por ndeshja e nesërme kundër Shkëndijës, është pikërisht momenti më i mirë për të dalë nga kjo krizë e rezultateve” – thotë Bojku.

Sipas numri 10 të skuadrës strugane, pozita e 5-të në renditje nuk është se pasqyron ekipin dhe cilësitë që ka Struga Trim Lum.

“Sipas kualitetit që e posedojmë në skuadër, besoj se vendi i 5-të në renditje nuk është i realt. Ndeshja e nesërme është një mundësi e mirë për tu rikthyer në binaret e duhura dhe të dëshmojmë se jo rastësisht jemi kampion në fuqi” – deklaroi Bojku, i cili në prag të ndeshjes së nesërme ka një ftesë edhe për tifozët strugan, që të jenë të pranishëm në numër sa më të madh në tribuna.

“Ndeshjet me Shkëndijën gjithmonë kanë qenë të paparashikueshme dhe interesante, ndaj shfrytëzojë rastin të ftoj publikun strugan që nesër të jenë prezent në numër sa më të madh, me një fjalë të jenë lojtari ynë i 12-të” – përfundoi Bojku, i cili nesër përballë Shkëndijës do të zhvillojë ndeshjen e tij të 8-të. Deri më tani Bojku në përballjet ndaj “kuqezinjëve” nga Tetova numëron 3 fitore, 2 barazime dhe 2 disfata.

Ndryshe Bojku nesër me fanellën e Struga Trim Lum do të zhvillojë ndeshjen e tij të 90-të.

Leave a Reply