LPFM, Mbyllen 45 minutat e para, shihni golat dhe rezultatet (VIDEO)

Janë mbyllur 45 minutat e para në 4 ndeshjet e javës së tretë në Ligën e Parë Futbollistike të Maqedonisë, njofton “infOSport.mk”. Në dy prej tyre skuadrat vendase ndodhen në avantazh, në Kratovë rrjetat po pushojnë në duelin midis Sileksit dhe Renovës, teksa Rabotniçki është skuadra e vetme që ka epërsi si mysafir.

Pikërisht “romantikët” shënuan golin e parë në ndeshjet e sotme, kur Ostoja Stjepanoviç nga pika e bardhë arriti që të mposhtë Tofiloskin që në minutën e 5-të.

Po nga penaltia edhe Vardari avansoi ndaj Makedonija Gjorçe Petrovit, kur Tigran Barsegian arriti që të mposhtë portierin Marko Jovanovski. Ky i fundit në mënyrë të palejuar kishte ndërhyrë ndaj Matej Cvetanoskit, me ç’rast arbitri kryesor kishte treguar në pikën e bardhë.

Epërsi minimale gjatë 45 minutave të para ka edhe lideri aktual, Akademia Pandev, që avansoi me golin e Dime Dimov në minutën e 21-të. Mbrojtësi i skuadrës vendase kërceu më së larti në zonën kundërshtare dhe me kokë arriti që të mposhtë portierin Suat Zendeli.

Ndeshja e vetme siç theksuam edhe në fillim ku rrjetat mbetën të paprekura gjatë 45 minutëshit të parë, është ajo midis Sileksit dhe Renovës, ku mysafirët pretendonin për një prekje me dorë nga ana e Dario Desniq, mirëpo arbitri kryesor Marjan Eckoski tregoi në fund vetëm rivënie nga këndi për “gjipspunesit”, të cilët janë në kërkim të fitores së dytë në sezonin e ri, pas asaj në javën e parë ndaj Rabotniçkit në Shkup.