Meriton Gega do të udhëheq Struga Trim Lum në ndeshjen e së mërkurës kundër Gostivarit, e vlefshme për çerekfinalet e Kupës së Maqedonisë së Veriut.
Gega luante rolin e ndihmës trajnerit të Qatip Osmanit, i cili ditë më parë vendosi të jap dorëheqje pas rezultateve jo të mira, sidomos në fillim të këtij stinori pranveror, kur skuadra kampione në fuqi u mund në të dyja ndeshjet e para, fillimisht përballë Gostivarit, gjegjësisht Vardarit.
Interesant është fakti, se Gega edhe vitin e kaluar në tre xhiro para fundit të kampionatit kishte marrë rolin e kryetrajnerit, teksa kishte debutuar pikërisht kundër Gostivarit.
Atë kohë, 4 maj të vitit 2024, Struga Trim Lum fitonte minimalisht 1:0 falë golit të shënuar nga Marjan Radeski, ndërsa vetëm 8 ditë më vonë, me Gegën në krye kishin regjistruar edhe atë fitore të madhe ndaj Shkëndijës, që në fund ju kishte siguruar edhe titullin kampion, të dytin në histori. (infOSport.mk)
