Shkendija deri në fund të sezonit do të luaj pa përkrahjen e publikut në Tetovë, pasi Komisioni Disiplinor pranë FFM-së e dënoi këtë klub me 6 ndeshje me tribuna të zbrazura.
Ky dënim vjen pas incidentit të ndodhur në ndeshjen gjysmëfinale të Kupës kundër Vardarit, kur pas zënkës mes kapitenëve të të dyja skuadrave në teren u futën disa nga tifozët e papërgjegjshëm të skuadrës tetovare.
Arbitri kryesor Aleksandar Stavrev pas gjithë kësaj e ndërpreu ndeshjen, e cila më pas vazhdoi sërish.
Kështu Shkëndija i bie që deri në fund të sezonit aktual si dhe dy ndeshjet e para të sezonit 2017/2018 ta luaj pa përkrahjen e tifozëve në stadiumin e saj në Tetovë, përfshirë këtu edhe ndeshjen e nesërme kundër Vardarit, e vlefshme për javën e 29-të në elitën e futbollit vendor.
Është ky pa dyshim një dënim shumë rigoroz nga ana e Federatës së Futbollit të Maqedonisë, që me siguri se do të ankimohet nga ana e drejtuesve të Shkëndijës ditëve në vijim.