Kampionët në fuqi të vendit në futboll, Shkëndija kthehen te fitorja pas barazimit të xhiros së shkuar me Makedonija Gjorçe Petrovi, duke fituar bindshëm ndaj Bellasicës me rezultat 3:0. Skuadra nga Strumica ishte e aftë të rezistojë vetëm në 45 minutat e para, pasi në të dytën Shkëndija gjeti tre gola me anë të Eminit, A. Ibraimit dhe Imerit. Trajneri Qatip Osmani ka vlerësuar performansën e skuadrës, ndërsa potencon se është shumë e pritshme që çdo kundërshtar në duelet me kuqezinjtë të hynë me motive të shtuara.
“Duhet të jemi të kënaqur me tre pikët e fituara edhe pse rezultati bindës tregon se e kishim të lehtë. Por përkundrazi, nuk ishte aspak e tillë dhe duhet të kemi parasysh se Shkëndija të gjitha ndeshjet do t’i ketë kështu të vështira për shkak se motivimi i kundërshtarëve ndaj neve është më i madh. Për këtë duhet të jemi të përgatitur psiqikisht dhe fizikisht. Ne pritshim ta kemi të vështirë pa marrë parasysh se Bellasica gjendet në pjesën e poshtme të klasifikimit. Por në fund ne morrëm fitore bindëse dhe shpresoj të mbajmë këtë ritëm edhe në ndeshjet në vazhdim”, ka thënë trajnerin i Shkëndijës Qatip Osmani.
Për dallim nga dy takimet paraprake, kuqezinjtë kundër Bellasicës në formacionin startues kishin tre ndryshime. Junior, Bojku dhe Nafiu ishin titullarë, ndërsa në pankinë u gjetën A. Ibraimi, Fazli dhe Totre.
“Sot ne ishim edhe të obliguar të bëjmë ndryshime në skuadër për shkak se kishim lojtarë që ishin me virozë. Disa lojtarë u detyruam t’i lëmë në pankinë, si që është Agim Ibraimi i cili këto ditë ishte me temperaturë”, tha trajneri kuqezi.
Fitorja e 14-të sezonale për kuqezinjtë në kombinim me humbjen e Akademia Pandevit bën që kuqezinjtë të zgjerojnë në 9-të pikë diferencën me skuadrën e vendit të dytë në tabelë, që tashmë sërish është Vardari.
“Mendoj se ne duhet të koncentrohemi në ndeshjet tona, të fitojmë në vazhdimësi. Për ne punë më e sigurtë është të fitojmë ndeshjet tona dhe mos të bazohemi te kundërshtarët. Gjithsesi na vjen mirë kur rezultatet e rivalëve na shkojnë në favorin tonë”, përfundoi tekniku Qatip Osmani.