Liverpulli apo Reali, kush do të kurorëzohet sonte kampioni i ri i Evropës!?

Sonte me fillim nga ora 21:00, stadiumi “Stade de France” do të jetë nikoqir i ngjarjes më prestigjioze të garave evropiane, ku dy skuadrat gjigande, Real Madridi dhe Liverpulli do të luftojnë kokë më kokë për trofeun e Ligës së Kampionëve.

Hera e fundit që Real Madridi e fitoi trofeun e çmueshëm të kësaj gare ishte pikërisht kundër Liverpoolit, ku në maj të vitit 2018 “galaktikët” mposhtën gjigantin anglez me rezultat 3:1, për t’u kurorëzuar me titullin e 13 evropian.

Në anën tjetër, “të kuqtë” e Jurgen Klop rikthehen në finale të Ligës së Kampionëve pas tre viteve, ku në vitin 2019 e mposhtën skuadrën e Totenhamit me rezultat 2:0 për ta fituar trofeun e gjashtë evropian në histori të klubit.

Ndërkaq, kjo do të jetë finalja e tretë mes këtyre dy klubeve në histori të Ligës së Kampionëve, ku në vitin 1981 Liverpulli e mposhti Realin me rezultat minimal 1:0, kurse në vitin 2018, gjiganti spanjoll triumfoi në finale me rezultat 3:1.

Finalja e këtij sezoni të Ligës së Kampionëve ishte paraparë që të zhvillohet në stadiumin “Krestovsky” të Shën Petersburgut të Rusisë, por si pasojë e agresionit rus në Ukrainë, UEFA vendosi ta zhvendosë finalen në Paris, që njëherit sonte do të jetë epiqendra e futbollit europian.

Leave a Reply