Ja si duket renditja tabelare pas 19 xhiro

Të dielën në futbollin vendor në program ishin ndeshjet e javës së parë në stinorin pranveror, ku ra në sy derbi i madh midis Shkëndijës dhe Vardarit. Në fund fitores iu gëzua skuadra tetovare, që në këtë mënyrë thelloi diferencën në pikë ndaj rivalit të përbetuar në +8 pikë, ndërsa shumë pranë Vardarit tashmë ndodhet edhe Akademia Pandev që të dielën në Strumicë pa shumë probleme mundi Makedonija GJ.P me rezultatin 3:0.

Akademia Pandev pas 19 xhirove numëron 33 pikë, vetëm dy më pak se Vardari, ndërsa nuk ka asnjë ndryshim në vijim të tabelës, me Rabotniçkin në pozitën e katërt që ka 27 pikë, 3 më shumë se FC Shkupi i vendit të 5-të, që nxorri një barazim të vështirë në Kratovë ndaj Sileksit, njëjtë sikurse edhe Renova e vendit të 6-të, që nga “Telekom Arena” në Tetovë u rikthye me një barazim 1:1 ndaj Rabotniçkit.

Vendi i 7-të i takon Makedonija GJ.P, që tashmë ka vetëm dy pikë më shumë se Sileksi i vendit të 8-të, ndërkohë dy pozitat e fundit janë të rezervuara për Pobedën dhe Bellasicën, që dje në Kërçovë barazuan me shifrat 1:1.